Orlofsuppbót og orlof

Orlofsuppbótin, að meðtöldu orlofi, greiðist þann 1. júní miðað við starfshlutfall og starfstíma á orlofsárinu (01. maí – 30. apríl), öllum starfsmönnum sem verið hafa samfellt í starfi hjá atvinnurekanda í 12 vikur á síðustu 12 mánuðum m.v. 30. apríl eða eru í starfi 1. maí. Orlofsuppbótin er kr. 60.000. Húsasmiðir og pípulagningamenn í ákvæðisvinnu fá greidda orlofsuppbót líkt og aðrir.

Iðnnemar í fullu starfi hjá fyrirtæki á námstíma fá fulla orlofsuppbót.

Fullt starf telst vera 45 unnar vikur eða meira fyrir utan orlof.

Þeir starfsmenn sem unnið hafa skemur skulu fá í orlofsuppbót í hlutfalli miðað við unnar vikur.

Dæmi: Þeir starfsmenn sem unnið hafa 20 vikur utan við orlof skulu fá kr. 26.667 (60.000/45*20).

Upphæð orlofsuppbótar eftir árum

Upphæðir miðast við fullt starf; hlutfallsreiknast eftir unnum vikum/starfshlutfalli.

Samkvæmt kjarasamningi og lögum eiga þeir sem sagt er upp störfum að fá öll áunnin orlofslaun greidd við starfslok. Hafi orlofslaunin ekki verið greidd þarf að ganga eftir þeim hjá viðkomandi atvinnurekendum. Hafi atvinnurekandinn orðið gjaldþrota ábyrgist Ábyrgðasjóður launa greiðslu þeirra.

Þeir sem eru eða hafa verið í hlutastarfi ávinna sér orlofslaun í samræmi við starfshlutfall, en eiga rétt á óskertu orlofi. Dæmi: Sá sem hefur áunnið sér 28 daga orlof á rétt á 28 dögum þrátt fyrir skert starfshlutfall.

Atvinnulausir sem skráðir eru hjá Vinnumálastofnun og hafa áunnið sér orlof gætu þurft að taka það. Ef ótekið orlof er skráð við starfslok getur viðkomandi þurft að vera án bóta í jafnmarga daga.

Orlofslaun skal greiða af öllu kaupi að kostnaðarliðum undanskildum.

Laugardagar, sunnudagar og helgidagar teljast ekki orlofsdagar.

Veita ber a.m.k. 20 virka daga á tímabilinu 2. maí – 15. september.

Þeir sem ekki fá 20 daga á sumarorlofstímabili eiga rétt á 25% álagi.